Umferðaröryggi

Þegar ekið er um í þoku utan þéttbýlis borgar sig að nota þokuljós bæði aftan og framan á bílum. Það er hinsvegar jafn nauðsynlegt að slökkva á þokuljósunum þegar komið er inn í þéttbýli eða skyggnið lagast. Sú mikla birta sem stafar af þokuljósum getur haft mjög truflandi áhrif á aðra ökumenn og því skal einvörðungu nota þau í þoku eða slæmu skyggni.

Umferðarstofa vill að gefnu tilefni minna á að ökumaður skal sjá um að í stað öryggisbeltis, eða ásamt því, noti barn viðurkenndan barnabílstól, beltispúða eða annan sérstakan öryggis- og verndarbúnað. Öryggisbelti er hannað fyrir fullorðið fólk og því þarf, með beltinu, að nota viðeigandi búnað hafi barn ekki náð 150 sm hæð. Þetta á við þrátt fyrir að um sé að ræða stuttar vegalengdir.

Lögregla höfuðborgarsvæðisins er þessa dagana að fylgjast sérstaklega með farsímanotkun ökumanna og hvort handfrjáls búnaður sé notaður. Sektir eru við því að nota ekki slíkan búnað. Það að tala í síma á meðan á akstri stendur er ein algengasta orsök athyglisbrests hjá ökumönnum og leiðir oft til tafa og óþæginda auk fjölda slysa og tjóna. Tekið skal fram að sektin sem er við því að nota ekki handfrjálsan búnað er yfirleitt hærri en handfrjálsi búnaðurinn kostar.

Lögreglan í Árnessýslu vill vekja athygli á að nauðsynlegt er að kynna sér hvað ökutæki þitt má draga þungan vagn áður en vagn er festur við ökutækið. Þessar upplýsingar er að finna í skráningarskírteini viðkomandi bifreiðar.

Alltof algengt er að ökumenn taki ekki eftir eða hreinlega virði ekki rautt ljós á gatnamótum. Margir hafa orðið vitni að hörðum árekstrum undir slíkum kringumstæðum með viðeigandi afleiðingum.  Ef við virðum rautt, þá eru engar líkur á árekstri. Ella er mikil hætta.